2020年3月31日蓮姐要離開《大帽山茶水亭》搬遷到《大帽山郊野公園遊客中心》（即毅行者八號檢查站位置），大家記住行多幾步，一齊繼續支持。
以後大家約腳嘅標記係《大帽山蓮姐茶水亭》！
《大帽山茶水亭》新鋪位置
講到大帽山，山友及踩車友必定認識我地的強大支援 - 大帽山蓮姐。
由年頭開始，蓮姐已經為租約招標一事煩惱，經歷廿五載寒暑，經歷過N屆毅行者。山友已習慣行完麥理浩徑第八段要去蓮姐大本營休息一下，飲枝冰凍嘅可樂，食串熱辣辣嘅燒賣，同蓮姐閒聊幾句，蓮姐就如同行山友嘅家人一樣，「大帽山蓮姐」已經係山徑路段其中一個地標。
直至今日蓮姐宣佈招標一事終於有結果，新店將會由「大帽山茶水亭」搬遷到「大帽山郊野公園遊客中心」（即毅行者八號檢查站𥚃面，距離舊店200米）。大家由舊店上大帽山波波方向行約200米（留意你的左手邊，小心錯過入口)！我們要品嚐嘅並不是單單食物本身嘅味道，而係一種人情味。舊店3月 31日將會租約期滿，而新店暫定將會4月繼續為行山友服務，到時大家記得記得記得去搵蓮姐啦！
