史丹利店長 - 大時代我們要有「煮到嚟就食」的從容!

當渣馬可能會取消這件事,跑壇正議論得人聲鼎沸時,肥強當正乜事都無,照常跟足Program 操練。

阿靚:彎刀 Pacers 都停止咗招募,渣馬真係好可能會取消,我報咗全馬,都唔知繼唔繼續操好?

肥強:無謂花時間去擔心,都唔到妳控制,我就唔理咁多,當乜事都無發生,照練可也,樂觀啲啦,希望在明天吖嘛!

阿靚:一向覺得跑步,同埋跑比賽係一件垂手可得,平常不過嘅事,估唔到會有咁嘅一日!

肥強:近排發生嘅嘢,令我醒覺以前好多認為係理所當然嘅嘢,原來唔係必然㗎,有得跑嘅日子真係要好好珍惜,阿靚唔好諗得咁複雜,當佢乜事都無發生專心練把啦,若果渣馬如期舉行,就盡情去馬,無得跑亦無需介懷,平常心啦!

肥強:近期好多大型賽事,毅行者都因為社會運動而取消,主辦機構除咗要考慮參賽者安全之外,龐大嘅物資供應運輸,都可能會受突發事故影響,呢種情況,我哋係諒解嘅,亂世中我們要有煮到嚟就食嘅從容,咁至能夠渡過大時代嘅驚濤駭浪!

雖然執筆時渣打馬拉松能否如期舉行,仍然是未知之數,但是大叔也祝各位跑友,不論如何,大家都盡情地去享受,能跑的日子!